Владимир Колоколтсев, вазири корҳои дохилии Русия даст доштани зердастонашро дар ташкили муҳоҷирати ғайриқонунӣ эътироф кард ва гуфт, дар ин самт ҷонибдори пурзӯр кардани муҷозот аст.

“Далелҳои иштироки кормандони милитсия дар қонунигардонии (фаъолияти) муҳоҷирон бартараф нашудаанд. Ман тасмими қонунгузоронро дар бораи бамаротиб зиёд кардани мӯҳлати ҷазо барои ин кор хеле муҳим медонам”, - гуфт Владимир Колоколтсев.

Ӯ рӯзи 29-уми октябр дар нишасти мушовараи Вазорати корҳои дохилии Русия гуфт, танҳо дар 9 моҳи соли ҷорӣ ҳудуди 160 корманд ва афсари милисаро барои мусоидат дар ташкили муҳоҷирати ғайриқонунӣ ба ҷавобгарии ҷиноӣ кашидаанд.

“Агар дар 9 моҳи соли 2023-ум 86 кормандро ба ҷавобгарӣ кашида бошанд, пас дар 9 моҳи соли 2024 теъдоди онҳо ба 160 нафар расидааст. Масалан, дар вилояти Тула амалҳои раҳбарони сатҳҳои гуногун тафтиш мешавад, ки барои иқомати бештар аз 1500 хориҷӣ иҷоза додаанд”, - афзуд Колоколтсев.

Бояд зикр кард, ки дар сатҳи роҳбарияти Русия муҳоҷиронро бо ҳар баҳона ва барои ҳар коре муттаҳам мекунанд ва дар  баъзе ҳолатҳо бидуни сабаб, азият медиҳанду аз кишварашон ихроҷ мекунанд. Ва ин аз камтарин ҳолатҳое аст, ки як вазири рус даст доштани кормандонашро дар ҷиноятҳое, ки то ин лаҳза танҳо марбут ба муҳоҷирон нишон медоданд, эътироф мекунад.

Дар Telegram, Facebook ва Instagram бо мо бимонед.