Консули Генералии Ҷумҳурии Тоҷикистон дар Екатеринбург Парвиз Асоев бо сафари корӣ аз Красноярск дидан намуд.

Тавре аз департаменти иттилооти Вазорати корҳои хориҷии ҷумҳурӣ иттилоъ доданд, дар рафти сафари худ ӯ бо роҳбарони минтақавӣ ва шаҳрӣ, намояндагони Хадамоти муҳоҷирати Вазорати корҳои дохилӣ ва Вазорати корҳои хориҷии Федератсияи Россия дар Красноярск вохӯриҳо анҷом дод.

 Аз ҷумла вохӯрии П.Асоев бо муовини раиси ш. Красноярск Владимир Шевляков баргузор гардид. Консули генералии Тоҷикистон аз наздик бо зиндагонӣ ва урфу одатҳои мардуми маҳаллӣ шиносоӣ пайдо намуд ва аз шарту шароити будубоши муҳоҷирони меҳнатии тоҷик дар ин шаҳр огоҳӣ ёфт.

 Дар рафти сӯҳбат Консули генералӣ аз мақсади ба нашр расонидани як ёдномаи махсус барои муҳоҷирони меҳнатие, ки барои кор озими Россия мешаванд, хабар дод. Ёднома тоҷикистониёнро аз урфу одат, қонунҳои асосӣ, ҳамчунин маълумотнома дар бораи шаҳр, таърихи он ва фарҳанг шинос менамояд.

 Дар рафти вохӯрӣ В.Шевляков иброз дошт, ки маъмурияти ш.Красноярск омода аст бо созмонҳои ҷамъиятии тоҷикони муқими Красноярск муколамаро таҳким намояд.

 П. Асоев инчунин бо намояндагони маъмурияти губернатор вохӯрӣ анҷом дод. Аз номи губернатори ноҳияи Красноярск Лев Кузнесов консули тоҷикро барои иштирок дар IХ форуми иқтисодии ноҳияи Красноярск, ки феврали соли 2012 дар Красноярск баргузор мегардад, форуми “Тартиби бехатарии муосир – Антитеррор” ва фестивали байналхалқии мусиқии кишварҳои Осиё-Уқёнуси Ором, даъват намуданд.