Рӯзи якшанбе, 26-уми январ дар Тоҷикистон ҷашни Сада – иди ба охир расидани сармо ва наздикшавии гармӣ таҷлил шуд. Ин ҷашн 50 рӯзу шаб пеш аз ҷашни Наврӯз таҷлил мегардад.

Дар Боғи фарҳангу фароғати ба номи Фирдавсӣ (собиқ боғи Дӯстии халқҳо) дар Душанбе ба ин муносибат чорабиниҳои идона баргузор шуданд.

Дар ин ҷо намоишгоҳи маҳсулоти кишоварзӣ ва таъомҳои миллӣ, ярмаркаҳои ниҳол, сарулибос ва маҳсулоти хӯрокворӣ ташкил шуданд.

1/19

Тоҷикистониёнро бо ин ҷашн раисҷумҳур Эмомалӣ Раҳмон таҳният гуфт.

“Ҳамаи ҳамватанони азизро бо ҷашни бостонии Сада табрик гуфта, барояшон саломативу хушбахтӣ ва барори кор орзу менамоям. Ҷашни Сада ҳамчун рамзи хуррамиву ободӣ, тандурустиву шодкомӣ ва дуркунандаи зиштиву нопокӣ аҳаммияти баланди иҷтимоӣ ва фарҳангӣ дорад”, - гуфта мешавад дар паёми шодбошии сарвари давлат ба ин муносибат.

Сарвари давлат қайд мекунад, ки “истиқлоли давлатӣ барои мардуми куҳанбунёди тоҷик имкони таърихие фароҳам овард, ки анъанаҳои фарҳангӣ ва ҷашнҳои миллии худро дар шаклу муҳтавои наву замонавӣ эҳё ва таҷлил намоянд”.

“Ҷашнҳои аҷдоди ориёии мо, ба монанди Садаву Наврӯз, Тиргону Меҳргон бозтоби пайванди инсону табиат, ойинҳои вобаста ба корҳои кишоварзӣ, инчунин, ҳунармандӣ буда, беҳтарин ғояҳои инсонӣ моҳият ва муҳтавои онҳо мебошанд. Гузаштагони мо барои талқини заҳматдӯстӣ, рушди кишоварзӣ ва арҷгузорӣ ба заҳмати одамон ин ойинҳоро таҷлил карда, умеду орзу ва нияту ҳадафҳои худро дар доираи онҳо ифода мекарданд”, - омадааст дар паём.

Гуфта мешавад, Сада дар саргаҳи ин ҷашнҳои миллӣ қарор дошта, он пеш аз ҳама, кишоварзонро аз оғози омодагӣ ба кишту кор, яъне тайёрӣ ба баҳор хабар медиҳад.

“Ин маъракаи воқеан халқӣ моро водор месозад, ки омодагиро ба фасли баҳор оғоз намоем, ҷӯю заҳбурҳоро тоза кунем, ниҳолҳои мевадору ороишӣ шинонем ва тухмии серҳосил интихоб кунем. Дар баробари ин, аз корҳои кишоварзии соли гузашта натиҷагирӣ карда, аз ҳозир барои рӯёнидани ҳосили фаровон ва боз ҳам беҳтар гардонидани таъминоти сокинони кишвар бо маҳсулоти озуқа замина гузорем”, - қайд мешавад дар паём.

Раисҷумҳур изҳори итминон мекунад, ки эҳёву таҷлили ҷашни Сада ҳамчун рамзи истиқболи фасли нуру гармӣ, некиву саховатмандӣ, сарҷамъӣ ва ваҳдати кулли шаҳрвандон дар густариши корҳои ободониву пешрафти Тоҷикистон нақши муассир гузошта, дар оғози сол чун паёмовари Наврӯзи оламафрӯз ба зиндагии мардум муждаи хуррамӣ хоҳад овард.

Лутфан, хабари муҳим, суол ва аксу видеоҳои ҷолибро дар бораи масоили ҳалталаби ҷомеа ба Asia-Plus тариқи Viber, Telegram, Whatsapp, Imo бо рақами +992 93 792 42 45 фиристед. 

Дар Telegram, Facebook, Instagram, Viber, Яндекс.Дзен, OK ва Google Новости бо мо бимонед.