Дар вилояти Нижний Новгороди Русия аз 1 октябр додани патент барои кор ба хориҷиён боздошта шуд. Дар ин бора Раёсати масоли муҳоҷирати Сарраёсати ВКД Русия дар ин минтақа хабар медиҳад.

Ба иттилои ин мақомот, додани патент ба шаҳрвандони хориҷӣ барои ҳуқуқи кор бар асосии фармоиши ВКД Русия №1/11198 аз 13 феврали соли ҷорӣ қатъ карда шудааст.

Дар ҳамин ҳол, тавре ки зикр мешавад, ба хориҷиёне, ки пештар патенти кор гирифта буданд, Раёсати масоили муҳоҷират ҳуҷҷатро дубора ба расмият дароварда, онҳо метавонанд ба корашон идома диҳанд.

Қобили зикр аст, ки аз моҳи апрели соли 2024 ба муҳоҷирон дар вилояти Нижний Новгород кор дар таксӣ манъ шуда буд.

«Коммерсантъ-Приволжье» хабар дода буд, ки дар зарфи 7 моҳи соли 2024 вуруди хориҷиён ба вилояти Нижний Новгород ба миқдори 24% - то 61 ҳазор нафар кам шуд, ки 62%-и онҳо маҳз муҳоҷирони корӣ мебошанд.

Қаблан дар минтақаҳои Русия ба кори муҳоҷирон дар баъзе соҳаҳо маҳдудият ҷорӣ шуд. Масаланд, ба онҳо кор дар соҳаҳои савдо, нақлиёт, мусофирбарӣ, бахши сайёҳӣ, маориф ва ғайра манъ шуд. Чунин маҳдудиятҳо ба сурати умум дар 23 минтақаи Русия ҷорӣ шуданд.

Аз 1 январи соли 2025 шаҳрвандони хориҷӣ наметавонанд дар корхонаҳои хӯроки умумӣ, мағозаҳои фурӯши машрубот ва тамоку, инчунин дар соҳаҳои хидматрасониҳои иҷтимоӣ, аз ҷумла бахшҳои варзиш, фарҳанг, фароғату истироҳат, тандурустӣ ва маориф дар вилояти Маскав кор кунанд.

Дар Telegram, Facebook ва Instagram бо мо бимонед.