Рӯзи 1-уми август банаворгирии филми таърихии “Дурахши ахтарон: Ҷомӣ ва Навоӣ” оғоз мегардад. Дар ин бора Маҳмадсаид Шоҳиён, раҳбари “Тоҷикфилм” имрӯз, 28-уми июл зимни нишасти матбуотӣ иттилоъ дод.

Ба гуфтаи ӯ, сабти филм соати 16:00 дар сайдони сабт ё павилони “Тоҷикфилм” шурӯъ шуда, дар маросими оғози наворгирӣ муовини сарвазири Тоҷикистон, роҳбарияти “Тоҷикфилм” ва “Ӯзбекфилм”, инчунин, ҳунармандони ду кишвар ширкат меварзанд.

Шоҳиён афзуд, марҳилаи аввали наворгирӣ моҳҳои август ва сентябр дар Тоҷикистон ва марҳилаи дуюм моҳҳои октябр ва ноябр дар Ӯзбекистон баргузор мешавад.

Ба қавли ӯ, филми “Ҷомӣ ва Навоӣ” дар моварои ҷашни Наврӯзи соли 2026 манзури тамошобинон мегардад.

Дар нишасти хабарии “Тоҷикфилм” гуфтанд, наворбардории филми мазкур дар павилонҳои ин муассиса, маконҳои таърихии Тоҷикистон, аз ҷумла, қалъаҳои Хуҷанд, Ҳисор, Балҷувон ва дигар маконҳо сурат мегирад.

Муҷассамаи Ҷомӣ ва Навоӣ дар Душанбе
Акс аз Asia-Plus

Раҳбари “Тоҷикфилм” дар нишасти қаблии худ моҳи феврали соли равон гуфта буд, ки сабти филми “Ҷомӣ ва Навоӣ” пас аз ҷашни Наврӯз шурӯъ шуда, соли ҷорӣ пурра наворбардорӣ ва соли 2026 рӯйи пардаи синамо меояд. Вале маълум мешавад, ки дар ҷашни наврӯз ин кор сурат нагирифт.

Бояд гуфт, ки тасмими филмбардорӣ дар бораи Ҷомиву Навоӣ соли 2021, зимни сафари президентони ду кишвар ба давлатҳои якдигар рӯи даст гирифта шуд.

Моҳи апрели соли 2024 матни филмнома тасдиқ гардид ва аввали моҳи ноябр корҳои омодагӣ ба наворбардории филм оғоз шуданд.

Ба иттилои дарёфтаи “Азия-Плюс”, буҷаи умумии филми “Дурахши ахтарон: Ҷомӣ ва Навоӣ” 10 млн доллари амрикоӣ гуфта мешуд.

Аз Абдураҳмони Ҷомӣ ҳамчун шахси ҳикматшинос ва файласуф ҳам ном бурда мешавад, ки бо панду ҳикматҳои хеш ҳамаро ба худ қарин карда буд ва ҳатто ҳукмронони давр низ мафтуни донишу заковати ӯ гардида буданд.

Яке аз ҷанбаҳои муҳим дар зиндагиномаи Абдураҳмони Ҷомӣ ин муносибати дӯстии ӯ бо Алишер Навоӣ, сардафтари адабиёти классикии адабиёти ӯзбек мебошад. Ҷомию шогирдаш Навоӣ бо ҳамдигар самимона дӯстиву ҳамкорӣ доштанд, ки он далели хуби муносибатҳои чандинасраи адабию фарҳангии байни тоҷикону ӯзбекон мебошад.

Солҳои охир, бо беҳ гаштани муносибатҳои Тоҷикистону Ӯзбекистон, дӯстии Ҷомӣ ва Навоӣ аз мавзӯҳои муҳиме дар суҳбатҳои сиёсатмадорони ду давлат гаштааст.

Дар Telegram, Facebook ва Instagram бо мо бимонед.