Бо қарори Шӯрои сиёсии Ҳизби демократи Тоҷикистон (ҲДТ) ҳамаи ташкилотҳои ҳизб ба корҳои омодагӣ ба маъракаҳои интихоботи парлумонӣ ва президентии соли 2010 дар ҷумҳурӣ оғоз карданд, хабар дод ба «Азия-Плюс» раиси ҲДТ, вакили палатаи поёнии парлумон Саидҷаъфар Исмонов.

Ба гуфтаи ӯ Шӯрои сиёсии ҳизб ба ҳамаи ташкилотҳои ноҳиявӣ, шаҳрӣ ва вилоятии ҲДТ дастур додааст, ки омодагӣ ба маъракаҳои интихоботиро оғоз намоянд.

«Мо таҷрибаи иштирок дар ин гуна маъракаҳои интихоботиро дорем ва иштибоҳҳои роҳдодаамонро дар интихоботи гузашта мавриди таҳлил қарор дода, роҳу воситаҳои нави кор бо интихобкунандагонро муайян мекунем», - қайд кард Исмонов.

Ба савол дар бораи омодагиаш ба гузоштани номзадӣ аз ҲДТдар интихоботи президентӣ, Саидҷаъфар Исмонов зикр кард, ки пешбарии номзад ба мансаби президентӣ дар интихобот салоҳияти анҷумани пешазинтихоботии ҳизб мебошад.

«Ман ҳозир тахмин карда наметавонам, ки тирамоҳи соли 2020 аз Ҳизби демократ кӣ ба номзадӣ ба мансаби президентӣ пешбарӣ мешавад», - изҳор дошт Исмонов.

Ёдрас мекунем, ки дар маъракаи интихоботи президентии соли 2013 ба ҷонибдории раиси Ҳизби демократи Тоҷикистон Саидҷаъфар Исмонов 36 ҳазору 573 нафар шаҳрванди кишвар овоз доданд, ки аз шумори умумии интихобкунандагон 1,02 фоизро ташкил дод.

Хабарҳои моро дар Telegram пайгирӣ намоед, ба шабакаи мо бо суроғаи  https://t.me/asiaplus  ҳамроҳ шавед.