Шӯрои Маҷлиси намояндагони Маҷлиси Олии Тоҷикистон имрӯз лоиҳаи тағйироту иловаҳо ба Кодекси ҳуқуқвайронкунии маъмуриро баррасӣ намуд.

Тавре ба «Азия-Плюс» котиби матбуотии палатаи поёнии парлумон Муҳаммадато Султонов хабар дод, аз ҷумла ҳукумат дар ин тағйироту иловаҳо пешниҳод мекунад, ки барои гузоштани муҳри махфӣ ба маълумоте, ки дорои сирри давлатӣ нестанд, масъулият ҷорӣ карда шавад.

Қобили зикр аст, ки зимни дастрас кардани маълумот намояндагони ВАО бештар бо ин мушкилӣ дучор мешаванд. Ахиран парвандаи роҳбари дастаи «КВН Тоҷикистон» Хайрулло Мирсаидов, парвандаи ширкати «Умед» ва қазияи ҳабси якчанд кормандони воломақоми Агентии зиддифасод беасос махфӣ унвон шуд.

Парвандаи ба ин монанди охир ба капитани милитсия Исломов марбут аст, ки бо автомашинааш наврасро дар Кӯлоб пахш намуда, ба марги ӯ боис гардид, лекин аллакай ду моҳ аст, ки тафтишот ӯро ба ҷавобгарӣ кашида наметавонад.

Ҳамчунин ҳукумат пешниҳод кардааст, ки барои ташкили пойгаҳои ғайриқонунии автомобилронӣ ва иштирок дар онҳо тағйирот ворид гардад.

«Барои гунаҳкорон дар ин амал ҷазои ҷарима дар ҳаҷми аз 12 ҳазору 500 сомонӣ то 15 ҳазор сомонӣ ва маҳрумият аз ҳуқуқи ронандагӣ ба муҳлати ду сол ҷорӣ мешавад», - хабар дод Султонов.

Илова бар ин дар лоиҳа бо мақсади ба танзим даровардани ба ноболиғ додани иҷозати воридшавӣ ба клубҳои шабона, дискоклубҳо, толори букмекерӣ ва марказҳои бозиҳои бурднок, инчунин марказҳои пешниҳоди бозиҳои копютерӣ ё хизматрасонии интернетӣ низ ҷорӣ шудани ҷавобгарии маъмурӣ пешбинӣ шудааст.

«Шаклҳои ҷарима ба қонуншиканони чунин меъёрҳо алҳол мавриди таҳия қарор дорад», - илова кард Муҳаммадато Султонов.

Хабарҳои моро дар Telegram пайгирӣ намоед, ба шабакаи мо бо суроғаи  https://t.me/asiaplus  ҳамроҳ шавед.