Дар пойтахти Тоҷикистон ба гузоштани арчаи солинавии имсола оғоз намуданд. Бори нахусти тайи солҳои охир як моҳ пеш ба гузоштани арчаи солинавӣ дар пойтахт шурӯъ карданд.

Тавре ба “Азия-Плюс” аз мақомоти шаҳрдории Душанбе хабар доданд, имсол арчаи солинавии пойтахт баландтарин дар таърихи Тоҷикистон хоҳад буд.

Арчаи солинавӣ дар майдони “Дӯстӣ”-и шаҳри Душанбе қомат афрохта, баландии он 28 метр ва масоҳаташ 13 метрро ташкил медиҳад.

Бино ба дастури раиси пойтахт Рустами Эмомалӣ арчаи асосии солинавии шаҳри Душанбе бояд то 10 декабр гузошта шавад. Чун соли пешин арчаи аосии кишвар имсол низ светодиодӣ мешавад.

Шоми 31 декабр, шаби соли нав дар майдони марказии Дӯстӣ бо иштироки ҳунармандони маъруфи тоҷик консерти идона доир гардида, дар анҷоми он 5 дақиқа мушакафканӣ (фейерверк) сурат мегирад.

Ёдрас мекунем, ки соли 2017 мақомоти шаҳрдории пойтахт 6 декабр ба гузоштани арчаи солинавӣ шурӯъ намуда, баландии он ба 25 метр расида буд.

Арчаи солинавӣ дар майдони марказии Душанбе соли 2017. Ба эътирофи сокинони пойтахт, он зеботарин тайи чанд соли охир буд.
Asia-Plus

Соли 2016 арчаи солинавии пойтахт бо баландии 20 метр ҳамагӣ чанд рӯз пеш аз фарорасии Соли нав қомат афрохт. Соли 2015 онро 30 декабр гузошта, аллакай рӯзи 2 январ барканда буданд.

Хабарҳои моро дар Telegram пайгирӣ намоед, ба шабакаи мо бо суроғаи  https://t.me/asiaplus  ҳамроҳ шавед.