Бино ба маълумоти Вазорати корҳои дохилии Тоҷикистон, хабар дар бораи хидмат дар мақомоти пулиси Русия, ки дар Telegram-каналҳо нашр мешавад, асоси воқеӣ надорад.
Шаҳрвандони Тоҷикистон, ки барои таҳсил ба Русия тибқи барномаҳои маълумоти олии ВКД Русия фиристода мешаванд, ба баргаштан ба ватан пас аз хатми таҳсил ва адои хидмат дар мақомоти корҳои дохилӣ ҳадди ақалл ба муҳлати 5 сол уҳдадоранд.
Маълумот дар Telegram-каналҳо дар бораи дар мақомоти пулиси Русия хидмат кардани онҳо асоси воқеӣ надорад. Дар ин бора ба ТАСС аз шуъбаи омодакунии кадрҳои ВКД Тоҷикистон хабар додаанд.
“Мо аз соли 2007 ва пеш аз ин ҳам бо ВКД Русия созишномаи дутарафа доштем. Мо дар заминаи мактабҳои олии Русия бепул кормандони мақомоти корҳои дохилиро тайёр мекунем ва онҳо уҳдадоранд, ки пас аз хатми таҳсил дар муддати панҷ сол дар мақомоти корҳои дохилии Тоҷикистон кор кунанд”, - гуфтааст намояндаи шуъба.
Ба иттилои номбурда, интихоби номзадҳо барои дохил шудан ба мактабҳои олии Русия ҳамасола дар доираи квота сурат мегирад.
“Ҳазорон хатмкардагони мактабҳои олии Русия дар мо хуб кор мекунанд ва ба ҳайати омӯзгорон ва афсарон, ки фарзандони моро таълим медиҳанду мутахассис тайёр мекунанд, изҳори миннатдорӣ мекунем”, - изҳор доштааст ҳамсуҳбати хабаргузорӣ.
Ӯ ҳамчунин таъкид доштааст, ки хатмкардагон аз Тоҷикистон дар ҳама гуна ҳолат наметавонанд дар ВКД Русия адои хидмат кунанд, зеро ВКД Русия шаҳрвандони кишварҳои хориҷиро ба кор қабул намекунад.
Рӯзи 13 июл дар сомонаи ВКД Тоҷикистон эълон дар бораи қабули довталабон барои таҳсил дар барномаҳои таҳсилоти олии касбии ВКД Русия дар соли таҳсили 2024-2025 нашр шуд. Пас аз ин дар Telegram-каналҳо дар бораи эҳтимоли дар пулиси Русия адои хидмат кардани шаҳрвандони Тоҷикистон маълумот чоп шуд.
Чанде пеш дар ВКД Русия низ ин маълумотро рад намуда, зикр карданд, ки мувофиқи қонуни федералӣ “Дар бораи хидмат дар мақомоти корҳои дохилии Русия ва ворид намудани тағйирот ба санадҳои алоҳидаи қонунгузории Русия”, шаҳрвандоне, ки шаҳрвандӣ ё тобеияти кишвари хориҷӣ, иҷозаи иқомат ё дигар ҳуҷҷати тасдиқкунандаи ҳуқуқи иқомат дар дигар кишварро доранд, дар мақомоти пулис ба кор қабул намешаванд.
Эълонҳои ба ин монанди таҳсил дар хориҷаро мунтазам дигар мақомот низ нашр мекунанд. Масалан, моҳи августи соли гузашта Кумитаи ҳолатҳои фавқулода дар бораи қабули довталабон ба таҳсил дар Донишгоҳи ҳифзи шаҳрвандии Беларус эълон чоп карда, моҳи июли соли ҷорӣ дар бораи имкони таҳсил дар Академияи ҳифзи шаҳрвандии Вазорати ҳолатҳоиф фавқулодаи Қазоқистон хабар дода шуда буд. Барои Кумита дар мактабҳои олии Вазорати ҳолатҳои фавқулодаи Русия низ мутахассисон омода карда мешаванд.
Руcский