Душанбе. 4-уми сентябр. ОИ «Азия-Плюс» - Намояндаи ҷамъияти робита бо ҳамватанони бурунмарзии «Пайванд»-и Тоҷикистон ба мухбири ОИ «Азия-Плюс» хабар дод, ки барои иштирок дар анҷумани навбатии тоҷикони ҷаҳон, ки аз 5-ум то 11-уми сентябр доир мегардад, намояндагони 26 кишвари дунё ба шаҳри Душанбе меоянд.

Ба қавли ӯ, дар чорабиниҳои идона бахшида ба ҷашни 17-умин солгарди Истиқлолияти давлатии Тоҷикистон ва 1150-умин солгарди Одамушшуаро Абӯабдуллои Рӯдакӣ дар маҷмӯъ, ҳудуди 90 намояндагони диаспораҳои бурунмарзии тоҷикон ширкат хоҳанд варзид.

«Мо меҳмонони тоҷикзабонро аз Иёлоти Муттаҳидаи Амрико, Фаронса, Олмон, Бритониёи Кабир, Австрия, Канада, Чин, Ҳиндустон, Гурҷистон, Белжик, Исроил, Марокко, Русия, Эрон, Покистон, Афғонистон, кишварҳои Осиёи Марказӣ ва дигар кишварҳо бесаброна интизорем», - таъкид сохт сарчашма.

Бино ба иттилои сардори департаменти иттилооти Вазорати умури хориҷии Тоҷикистон Давлат Назриев, меҳмонони анҷуман аз аксари шаҳрҳои ҷумҳурӣ, аз ҷумла зодгоҳи шоир Абӯабдулло Рӯдакӣ - деҳаи Панҷрӯди ноҳияи Панҷакент низ боздид менамоянд. Дар ин деҳа баргузор намдани чорабиниҳои ҷашнии шоир ба нақша гирифта шудааст.