Пуғус. 18-уми сентябр. ОИ «Азия-Плюс» - Зимни суханронӣ дар Анҷумани III -уми зиёиёни илмӣ ва эҷодкори кишварҳои узви Иттиҳоди Давлатҳои Мустақил (ИДМ) президенти Тоҷикистон Эмомалӣ Раҳмон изҳор дошт, ки мо ин анҷуманро як рӯйдоди муҳиме на танҳо барои Тоҷикистон, балки барои тамоми давлатҳои аъзои иттиход низ арзёбӣ менамоем.

Сарвари давлати Тоҷикистон зикр кард, ки ҳамгиройии кишварҳо аз наздикшавии фарҳанг, адабиёт ва илму маориф сарчашма мегирад. «Ин ҳақиқатро равандҳои ҳамгиройии 50 соли ахир дар Аврупо, ки ба таъсиси Иттиҳодит Аврупо боис гаштанд, собит карданд», - таъкид сохт Э.Раҳмон.

Ба гуфтаи президент, робитаҳои фарҳангии кунунӣ миёни кишварҳои иттиҳод ба талаботи имрӯза ҷавобгӯ нест ва феълан аксари китобҳое, ки дар кишварҳои ИДМ ба нашр мерасанд, дастраси кишварҳои дигар шуда наметавонанд. Э.Раҳмон изҳори боварӣ намуд, ки масоили дар анҷуман баррасишуда ба густариши на танҳо робитаҳои фарҳангиву гуманитарӣ, балки ба рушди ҳамкориҳои иҷтимоиву иқтисодӣ низ мусоидат хоҳад кард.