Душанбе. 19-уми сентябр ОИ «Азия-Плюс» - Ҳангоми суханронӣ дар маросими ифтитоҳи расмии Анҷумани III -уми зиёиёни илмӣ ва эҷодкори кишварҳои узви Иттиҳоди Давлатҳои Мустақил (ИДМ) президенти Тоҷикистон Эмомалӣ Раҳмон изҳор дошт, ки бо ҷомеаи ҷаҳонӣ мо бо забони русӣ гуфтушунид мекунем.

«Дар Тоҷикистон дар ҳамаи муассисаҳои таълимӣ омӯзиши забони русӣ ҳатмӣ аст ва мо инро на бо талқини Маскав, балки барои он амалӣ месозем, ки бо ин забон мо бо ҷомеаи ҷаҳонӣ, бо шарикони худ дар арсаи байнулмилалӣ ва чорабиниҳои сатҳи ҷаҳонӣ гуфтугӯву баромад мекунем.», - гуфт ӯ. Сарвари давлат қайд кард, ки донистани забони русӣ барои донишҷӯёну олимон ва дигар намояндагони ҷомеа шароиту имконоти мусоиди шиносоӣ бо дастовардҳои беназири илму фарҳанги ҷаҳонро фароҳам месозад.

Эмомалӣ Раҳмон ҳамчунин зикр кард, ки бояд сиёсатмадорон баҳри равуои бемалоли олимону зиёиёни кишварҳои иттиҳод дар қаламрави давлатҳо шароити мусоид ба вуҷуд оранд. «Дар наздикшавӣ ва ҳамгиройии халқҳои кишварҳо намояндагони илму фарҳанг саҳми назаррас доранд ва забони русӣ низ дар ин кор аҳамияти махсусро касб кардааст», - таъкид сохт сарвари давлати Тоҷикистон.