Душанбе. 23-уми сентябр. ОИ «Азия-Плюс» - Аз 12 то 16-уми октябр дар пойтахти Тоҷикистон ҷашнвораи III -уми байнулмилалии кинои «Дидор» баргузор мешавад.

Сухангӯи ҷашнвора Денис Бекетов ба ОИ «Азия-Плюс» хабар дод, ки сарпарастони асосии ҷашнвора «Институти ҷомеаи Кушод - Фонди Мусоидат. Тоҷикистон»   ва Агентии рушду ҳамкории Швейтсария дар Тоҷикистон мебошанд. Мавсуф зикр кард, ки мувофиқи қарори Кумитаи тадорукот,   тамоми чорабиниҳо, аз қабили намоиши филмҳо, мизҳои мудаввар, муаррифии филмҳои беҳтарини коргардонҳои Осиёи Марказӣ ва нишастҳои матбуотӣ дар Хонаи Кино ва Маркази фарҳанги ҳиндии сафорати Ҳиндустон дар Тоҷикистон доир мегарданд.

Д.Бекетов меӯяд, тибқи консепсияи ҷашнвора, ба ҳакамон ва тамошобинон 24 филми коргардонҳои кишварҳои Осиёи Марказӣ, Қафқоз, Русия, Афғонистон, Эрон, Муғулистон, Олмон ва Туркия намоиш дода мешавад.

Ба ҷуз барномаи озмунӣ, ҳамчунин дар доираи чорабиниҳои ҷашнвора намоиши филмҳои муосири афғонӣ, мизи мудаввар дар мавзӯи «Шарқу Ғарб: дурнамои ҳамкориҳо», муаррифии маҷмӯаи дискҳои киношиноси қазоқ Гулнора Абикеева, «Кинои мустанади Осиёи Марказӣ: Даврони Шӯравӣ ва солҳои нахустини соҳибистиқлолӣ» ва муаррифии китоби «Панҷ садо» (намунаи ашъори панҷ шоири Эрон) баргузор мешавад.