Душанбе. 12-уми март. ОИ «Азия-Плюс» - Соли равон ҷашнвораи ҷумҳуриявии театрҳои касбӣ «Парасту» баргузор намешавад.

Тавре ба ОИ «Азия-Плюс» аз Вазоарти фарҳанги ҷумҳурӣ хабар доданд, бинобар камбуди маблағ чунин қарор қабул гардида, мӯҳлати баргузории ҷашнвораи минбаъда низ мушаххас нест. Ёдрас мекунем, ки баргузории ҷашнвораи XIII -уми ҷумҳуриявии театрҳои касбӣ «Парасту» аз 23 то 31-уми март дар шаҳри Душанбе ба нақша гирифта шуда буд.

Тибқи иттилои қаблӣ, ҳаҷми мукофотпулии ҷашнвора ба андозаи 12 ҳазор сомонӣ муқаррар гардида, ғолибон ва ба Шоҳҷоизаи ҷашнвора ноилгаштагон ба иштирок дар Ҷашнвораи байнулмилалии театрҳои касбӣ - «Наврӯз» роҳхат мегирифтанд, ки он бояд моҳи апрел дар ҷумҳурӣ доир мегашт.

  Ба иттилои манбаъ, ҷашнвораи «Наврӯз» низ доир намегардад. «Ин ҷо ду сабаб мавҷуд аст – ҷиҳати молиявӣ ва баргузории миқдори зиёди чорабиниҳои фарҳангӣ дар соли равон», - афзуд манбаъ.