Душанбе. 11-уми июн. ОИ «Азия-Плюс» - Дар пешорӯи нишасти сарони кишварҳои узви Созмони Ҳамкории Шанхай имрӯз дар шаҳри Екатеринбург намоишгоҳи маҳсулоти ҳунарҳои мардумии кишварҳои узви иттиҳод ба кор шурӯъ кард.

            Чӣ тавре ки ба ОИ «Азия-Плюс» аз Вазорати фарҳанги ҶТ иттилоъ доданд, ҳайати Тоҷикистон дар намоишгоҳ маҷмӯи сарулибоси миллӣ, қолин ва китобҳоро пешкаш месозад. «Ҳамчунин гурӯҳи калони ҳунарпешагони Тоҷикистон пагоҳ барои иштирок дар ҷашнвораи ҳунарии мамлакатҳои аъзои СҲШ ба шаҳри Екатеринбург меравад», - гуфтанд дар вазорати фарҳанг.

            Ёдрас мекунем, ки рӯзҳои 15-16-уми июн дар шаҳри Екатеринбург нишасти навбатии сарони кишварҳои узви Созмони Ҳамкории Шанхай доир мегардад. Кишварҳои Чин, Русия, Қазоқистон, Қирғизистон, Тоҷикистон ва Ӯзбекистон шомили СҲШ мебошанд.