Душанбе. 28-уми июл. «Азия-Плюс» — | Дар сардафтари Созмони Милали Муттаҳид дар Ню-Йорк ба истиқболи ҷашни 20-солагии Истиқлолияти Ҷумҳурии Тоҷикистон маросими ифтитоҳи Намоишгоҳи акс ва нигораҳо, ки «Тоҷикистон – кишвари обу кӯҳсорон» унвон дошт, бо тантана баргузор гардид.

 Намоишгоҳ, ки муддати як ҳафта идома хоҳад ёфт, аз расмҳои аксбардори аккоси тоҷик Нозим Қаландаров ва нақшҳои рассоми шинохтаи тоҷик Леонид Хушвахтов иборат аст. Дар нигораҳо, манзараҳои зебои табиати кишвар инъикос ёфтаанд.

 Намояндаи доимии Ҷумҳурии Тоҷикистон дар СММ Сироҷиддин Аслов ва муовини Дабири Кулли СММ Виҷай Намбияр бо суханони табрикӣ баромад намуда, меҳмонони намоишгоҳро хайрамаҳқдам гуфтанд.

 Дар маросими ифтитоҳи кушодашавӣ дипломатҳо, кормандони СММ, намояндагони воситаҳои ахбори омма ва ҳамчунин тоҷикистониёне, ки айни замон дар ШМА зиндагонӣ мекунанд ширкат варзиданд.