Чанде қабл дар шаҳри Париж зери манораи Эйфел бо ташаббуси Сафорати Ҷумҳурии Тоҷикистон дар Шоҳигарии Белгия дар якҷоягӣ бо диаспораи тоҷик дар Фаронса ва Иттиҳодияи фаронсавии «Наврӯз» Иди байналмилалии Наврӯз ҷашн гирифта шуд.

Тавре ба ОИ «Азия-Плюс» аз сафорати Тоҷикистон дар Белгия хабар доданд, дар ин чорабинӣ намояндагони диаспораҳои Афғонистон, Ҳиндустон ва Эрон бо ҳамроҳии намояндагони сафорати Тоҷикистон ҷашни Рӯзи байналмилалии Наврӯзро таҷлил карданд. «Намояндагон ва сайёҳоне, ки ба тамошои манораи Эйфел ҳамарӯза аз тамоми гӯшаву канори дунё меоянд, шоҳиди ин иди бошукуҳ гардиданд», - гуфтанд дар сафорат. 

Ба иттилои манбаъ, дар рафти чорабинӣ  Раиси ассотсиатсияи «Journée Internationale de Norouz», узви ҷамъияти «Пайванд», профессори Донишгоҳи Париж ва маркази тадқиқотии «Кюри» Масъуди Миршоҳӣ ба хозирин, ки теъдоди онхо аз се ҳазор зиёд буд, оид ба таърихи пайдоиши Наврӯз, расму русум, урфу одат, тарзи ҷашнгирии он ва либосҳои миллии кишварҳои номбурда маълумот дод. «Инчунин дар ҷараёни таҷлили ҷашн намоиши сарулибоси миллии минтақаҳои кишварҳои дар боло зикргардида ба маърази тамошобинон гузошта шуд», - гуфт манбаъ.

Зикр гардид, ки ҷамъомадагон аз фарҳанги куҳани ҷашни Наврӯз, ки зиёда аз 300 миллион нафар аҳолии рӯйи заминро муттаҳид месозад, бо камоли майл изҳори хушнудӣ карданд.