Дар ҷараёни Ҳафтаи Аврупо дар Тоҷикистон, ки 30-юми октябр оғоз гардида то 4-уми ноябр идома меёбад, ба тоҷикистониён фарҳанги мардуми кишварҳои Аврупо муаррифӣ мегардад.

Тавре ба ОИ «Азия-Плюс» аз маркази фарҳангии «Бактрия» иттилоъ доданд, барномаи Ҳафтаи Аврупо аз як қатор чорабиниҳо иборат хоҳад буд, ки аз ҷониби маркази мазкур ва намояндагии Иттиҳоди Аврупо дар Тоҷикистон созмон дода мешаванд.

«Дар чаҳорчӯби ин чорабинӣ баргузории консерти ҳунармандони Театри давлатии академии опера ва балети ба номи С.Айнӣ бо барномаи асарҳои оҳангсозони аврупоӣ, ҳамоишҳои ҷавонон, машғулиятҳо дар бораи нависандагони фаронсавӣ ва таъсири кинои аврупоӣ ба бахши кинои Тоҷикистон дар назар аст», - гуфтанд дар марказ.

Ба иттилои манбаъ, дар Хонаи кино фестивали филмҳои аврупоӣ доир гардида, дар он филмҳои коргардонҳои Олмон, Финландия, Фаронса ва Англия намоиш дода мешаванд. «Рӯзи 3-юми ноябр чунин барнома дар шаҳри Ваҳдат низ баргузор мешавад», - афзуд сарчашмаи хабар.