Рӯзи 19-уми август дар боғи ботникии «Боғи Ирам»-и пойтахт фестивали ҷумҳуриявиии ҳунарҳои мардумӣ доир мегардад. Фестивал аз ҷониби Вазорати фарҳанги ҶТ созмон дода шуда,  дар доираи чорабиниҳои Конфронси байнулмилалии сатҳи баланд оид ба ҳамкорӣ дар соҳаи об баргузор мешавад.

Чӣ тавре ки ба ОИ «Азия-Плюс» аз Вазорати фарҳанги ҷумҳурӣ иттилоъ доданд, дар фестивал ҳунармандони тамоми минтақаҳои кишвар, аз ҷумла заргарону оҳангарон, дуредгарон, зардӯзон, кулолгарон ва намояндагони дигар ҳунарҳои мардумӣ бо маснӯоти худ иштирок мекунанд.

«Барои сокинону меҳмонони пойтахт намоишгоҳи шириниҳо, хӯрокҳои миллӣ, мева ва нӯшокиҳо ташкил карда мешавад. Тамошобинон аз ҳунарнамоии дорбозону мусиқачиён ва артистҳо баҳра бурда метавонанд», - гуфтанд дар вазорат.

Бино ба маълумоти Вазорати фарҳанги ҶТ, дар доираи фестивал баргузор намудани консерти дастаҳои фолклорӣ ва гурӯҳҳои ҳунарӣ аз шаҳру навоҳии гуногуни кишвар низ дар назар аст.