Чанде қабл коргардони маъруфи театр Барзу Абдураззоқов барои кор дар Театри давлатии академии русии ба номи Чингиз Айтматов аз Душанбе ба Бишкек раҳсипор шуд.

Номбурда ба ОИ «Азия-Плюс» дар ин робита изҳор намуд, ки маҷбур аст, ки муҳоҷирати кориро ихтиёр намояд, «зеро ӯ бояд кору зиндагӣ карда, дар Тоҷикистон вазъаш номуайян буд». «Ман ба мақомоти шаҳрдорӣ ташкили студияи омӯзиши маҳорати актёрӣ барои хоҳишмандон ва донишҷӯёни Донишкадаи ҳунарро пешниҳод кардам, вале ба он таваҷҷуҳ зоҳир накарданд», - иброз дошт коргардон.

Барзу Абдураззоқов мегӯяд, муваққатан ҳиҷрат ба хориҷи кишварро ихтиёр кардааст, зеро ба ӯ дар ду кишвар – Қирғизистон ва Русия ба муддати 3 сол тибқи қарордод кор пешниҳод шудааст.

«Ҳозир ман ба назди вазири фарҳанги Қирғизистон меравам. Ӯ маро ба назадаш даъват карда, мо масъалаи корамро дар Театри давлатии академии русии ба номи Чингиз Айтматов баррасӣ мекунем. Ба ман пешниҳод шуд, ки дар ин ҷо курси академии худро ташкил кунам», - зикр кард ӯ.

Ба қавли коргардон, ӯ муваққатан Тоҷикистонро тарк мегӯяд, лекин шояд минбаъд дар хориҷа бимонад. «Ман ба ҷойе раҳсипор шудам, ки дар он ҷо зарураму ба ман эҳтиёҷ доранд», - афзуд Б.Абдураззоқов.