Ахири моҳи май Рӯзҳои фарҳанги Русия дар Тоҷикистон баргузор мешаванд.

Тавре ба «Азия-Плюс» аз Вазорати фарҳанги ҶТ хабар доданд, маросими расмии Рӯзҳои фарҳанги Русия дар Тоҷикистон санаи 26-уми май дар Театри давлатии академии опера ва балети ба номи Садриддин айнӣ доир мегардад. Оркестри миллии симфонии Тоҷикистон таҳти раҳбарии дирижёр, дорандаи ҷоизаҳои озмунҳои байнулмилалӣ Сергей Кондрашов ба тамошобинон консерт медиҳанд. Дар фойеи театр намоишгоҳи аксҳо пешкаш мегардад.

«Ҳайати Русия аз 45 нафар мусиқачиёну ҳунармандони театр, сарояндагони опера ва дигар иштирокчиёни барномаи фарҳангӣ иборат хоҳад буд», - гуфтанд дар вазорат.

Ба иттилои манбаъ, рӯзи 27-уми май ҳайати Русия ба дараи Варзоб сафар мекунад. Худи ҳамон рӯз дар Консерваторияи миллии ба номи Т.Сатторов вохӯрии эҷодӣ ва машғулиятҳои касбии ҳунармандони тоҷику рус барпо мегардад. Пас аз ин дар Театри давлатии драмавии ба номи В.Маяковский намоишномаи дипломии спектакли «Лес» (Ҷангал) аз рӯи асари А.Островский дар иҷрои донишҷӯёни факултаи актёрии Донишкадаи давлатии умумирусиягии кинематографияи ба номи С.Герасимов (ВГИК) баргузор мешавад.

Рӯзи 28-уми май меҳмонон аз шаҳри Норак боздид намуда, бо китобхонаи «Дӯстии халқҳо» аз наздик ошно мегарданд ва композитсияи адабӣ-мусиқӣ бахшида ба Ҷанги Бузурги Ватаниро тамошо мекунанд. Онҳо ба Осорхонаи Миллии Тоҷикистон, боғи ботаникӣ ва дигар макони тамошобоби шаҳри Душанбе низ ташриф меоранд.

Зимнан зикр гардид, ки рӯзи 29-уми май дар толори Театри давлатии академии опера ва балети ба номи Садриддин Айнӣ консерти хотимавӣ барпо мешавад.