Шӯро оид ба ҳамкориҳои фарҳангии кишварҳои узви Иттиҳоди Давлатҳои Мустақил дар зумраи шахсиятҳои машҳури Арманистон, Белорус, Қирғизистон, Россия ва Украина се нафар намояндагони Тоҷикистонро бо мкофотҳо сарфароз гардонид.

Тавре аз Вазорати фарҳанги ҶТ хабар доданд, Вафо Назаров, Рассоми халқии Тоҷикистон, Лауреати мукофоти давлатии Тоҷикистон «барои фаъолияти бисёрсола ва саҳми арзанда дар тарғиби санъати тасвирӣ» ва Суҳроб Мирзоев, раиси Иттифоқи ходимони театри Тоҷикистон, директори Театри давлатии дарамаи русии ба номи Вл.Маяковский «барои ҳиссаи пурсамар дар ташаккули фазои умумии театрӣ» бо Ифтихорнома ва медали хотиравӣ сазовор дониста шуданд.

Гуфта мешавад, инчунин Абдуғаффор Абдуҷабборов, нависанда, тарҷумон, драматург, доктори фахрии фалсафа дар соҳаи адабиёт, академики Академияи мусаввирии Тоҷикистон «барои саҳми шахсӣ дар рушди адабиёти миллӣ ва фаъолияти тарҷумонӣ дар доираи Иттиҳоди Давлатҳои Мустақил дар соли 2014» низ бо чунин мукофотҳо қадрдонӣ гардид.