Вазирони фарҳанги Русия ва Тоҷикистон Владимир Мединский ва Шамсиддин Орумбеков Барномаи байниидоравии ҳамкорӣ барои солҳои 2015-2017-ро ба имзо расониданд.

Бино ба иттилои хадамоти матбуоти Вазорати фарҳанги Русия, Барнома   дар доираи Машварати 12-уми вазирони фарҳанги кишварҳои узви Созмони ҳамкории Шанхай ба имзо расида, дар машварат ҳамчунин масъалаи омодагӣ ба баргузории Рӯзҳои Тоҷикистон дар Русия низ мавриди баррасӣ қарор гирифтааст.

Гуфта мешавад, Мединский ва Орумбеков оид ба рушди ҳамкориҳои гуногунҷабҳаи фарҳангӣ миёни кишварҳо, аз ҷумла дар бахшҳои ҳунарҳои тасвирӣ ва саҳнаофарӣ, мусиқӣ, сирк, табодули таҷрибаву мутахассисон дар соҳаҳои фарҳанг, баргузории чорабиниҳои гуногуни фарҳангии муштарак, такмили ихтисоси мутахассисони ин бахш бо истифода аз имконоти ҳарду ҷониб ва ғайра ба мувофиқа расидаанд.

Зимнан зикр мегардад, ки моҳи августи соли 2015 дар шаҳрҳои Маскаву Ярославл ва Калинингради Русия Рӯзҳои фарҳанги Тоҷикистон баргузор мешавад.