Дар Донишгоҳи давлатии техникии Тоҷикистон  ба номи академик Муҳаммад Осимӣ бо ҷалби намояндагони аҳли фарҳанги кишвар ва доираи васеи устодону донишандӯзони ин муассисаи таҳсилоти олӣ, бахшида ба 150-солагии адиб Нақибхон Туғрали Аҳрорӣ ҳамоиши фарҳангӣ доир гардид.

Сомонаи расмии шабакаи телевизиони «Ҷаҳоннамо» дар шарҳи ин хабар менависад, ҳозирин атрофи кору фаъолияти Нақибхон Туғрал маърӯзаҳои пурмӯҳтаво хонда, аз эҷодиёти ӯ намунаи ашъор қирот ва маънидод кардаанд.

Гуфта мешавад, аз ҷумла зикр гардидааст, ки Нақибхон Туғрали Аҳрорӣ дар таърихи адабиёти тоҷик бо эҷоди навоваронааш маъруф буда, ин навовариҳо ҳаводорону хонандагони ашъори ӯро бешумор кардааст. Ин ҷанбаҳои эҷодиёташ ашъори ӯро на танҳо то ба имрӯз, балки дар оянда низ ҷовидона нигоҳ медоранд.

Зимнан зикр мегардад, ки дар ҳамоиш инчунин аз саҳм ва фидокориҳои ин фарзанди фарзонаи миллати тоҷик барои рушду устувории пояҳои адабиёт ёдоварӣ намуда, бо қироати порчаҳои шеърӣ моҳияти афкори ӯ ба ҳозирин шарҳ дода шуданд.