Бо қарори раиси вилояти Суғд Абдураҳмон Қодирӣ, моҳи октябри соли равон дар қаламрави вилоят Фестивали «Атлас ва адраси тоҷик-2015» гузаронида мешавад.

Бино ба маълумоти хадамоти матбуоти раиси вилоят, фестивал бо мақсади рушди соҳаи саноати сабук, аз ҷумла ривоҷу равнақ бахшидан ба истеҳсоли матои атлас ва адраси дастибоф ва тарғиби сару либос аз матоии табии аз ҷиҳати экологӣ безарар бо истифодаи услубҳои миллии дӯзандагӣ доир мегрдад.

Гуфта мешавад, ҳамчунин ҳадаф аз баргузории фестивал рушди меҳнати хонагӣ, аз ҷумла гулдӯзӣ ва қуроқдӯзӣ, ки як навъ арҷгузорӣ ба анъанаҳои миллии бофандагӣ, фарҳанги либосдӯзии аҷдодӣ ба ҳисоб меравад ва ҳамчунин баланд бардоштани завқи либоспӯшии миллӣ, зебоипарастӣ ва ғанӣ намудани ҳаёти маънавии занону бонувон мебошад.

Зимнан зикр мегардад, ки ба иштирокчиёни беҳтарини фестивал аз 1 000 то 10 000 сомонӣ мукофотпулиҳо дода мешавад.