Душанбе. 11-уми июл. ОИ «Азия-Плюс - «Дар таҳқиқи ҷараёни салафия таҳлили ҳамаҷониба ва муносибати фардӣ зарур аст, то ки ба умқи масъала сарфаҳм рафта, пайдоиши «гург дар ниқоби гӯсфанд»-ро пешгирӣ кунем», - изҳор дошт раиси Кумитаи исломии Русия, коршиноси маъруф оид ба масъалаҳои ислом Ҳайдар Ҷамол.

Имрӯзҳо ӯ дар шаҳри Душанбе қарор дорад ва дар мусоҳиба ба ОИ «Азия-Плюс» перомуни вазъи ислом дар Тоҷикистон ва пайдоиши ҷараёни салафия чунин изҳори назар кард, ки ӯ ба ҳамаи мусулмонон новобаста аз мансубияташон ба ҷараёне муносибати якхела дорад ва ҳамеша аз як мавқеъ ба онҳо баҳо медиҳад: «онҳо ба ислом хизмат мекунанд ё ба душманони он?».

«Дар дохили ислом хадамоти махсуси амрикоӣ амал мекунанд, ки бо ошкор сохтани онҳо мо аниқ хоҳем кард, ки дар асл кӣ гунаҳкор аст», - таъкид сохт Ҳ.Ҷамол. Ӯ намояндгони ҳаракати «Толибон» ва Ҳаракати исломии Ӯзбекистонро ба сифати намуна мисол овард, ки онҳо бо хадамоти махсуси амрикоӣ робита доранд.

Коршинос таъкид сохт, ки миёни тамоми ҷараёнҳои ислом бояд робитаву гуфтушунид барқарор бошад, то ки аз муноқишаву ташаннуҷи вазъ ҷилавгирӣ шавад.

Дар ҳамин ҳол, ӯ аз шарҳи муфассали афкору ғояҳои ҷараёни салафия дар ислом худдорӣ кард.