Душанбе. 2-юми июн. ОИ «Азия-Плюс» - Имрӯз баъди вохӯрӣ бо президенти Тоҷикистон Эмомалӣ Раҳмон Комиссари Олии САҲА оид ба умури аққалиятҳои миллӣ Кнут Воллебек изҳор дошт, ки ояндаи наздик Созмони Амният ва Ҳамкории Аврупо барои намояндагони аққалиятҳои миллии муқими Тоҷикистон оид ба омӯзиши забони тоҷикӣ тренингҳо барпо месозад. «Эмомалӣ Раҳмон ба ман дар бораи аққалиятҳои миллии муқими Тоҷикистон, урфу одат ва анъанаҳои фарҳангии онҳо маълумоти муфассал дод», - гуфт ӯ.

К.Воллебек гуфт, САҲА аз ҳуқуқи тоҷикони хориҷи кишвар баҳри гирифтани маълумот бо забони модарӣ, рушди фарҳанг ва нашри китобу дигар адабиёт дифоъ хоҳад кард.

Номбурда ба намояндагони ВАО хабар дод, ки имрӯз бо вазири умури хориҷии ҶТ Ҳамрохон Зарифӣ дидору гуфтушунид карда, пагоҳ бо вазири фарҳанг Мирзошоҳрух Асрорӣ, вазири маориф Абдуҷаббор Раҳмонов ва намояндагони аққалиятҳои миллӣ мулоқот хоҳад орост.