Душанбе. 10-уми август. «Азия-Плюс» — | Собиқ маҳбусони Гуантанамо аз Тоҷикистон ҳам ба афв ҳуқуқ доранд, - гуфта мешавад дар нома-изҳороти созмони байнулмилалии дифоъ аз ҳуқуқи Хюман Райтс Вотч (Human Rights Watch) ба унвони президенти Тоҷикистон Эмомалӣ Раҳмон.

Дар нома дар бораи 2 нафар шаҳрванди Тоҷикистон – Рӯҳниддин Шарофов ва Абдумуқит Воҳидов сухан меравад. Бино ба маълумоти Human Rights Watch, Шарофов ва Воҳидов дар мурофиаҳои маъмурӣ дар Гуантанамо  гуфтаанд, ки онҳоро тариқи зӯрӣ ба Афғонистон бурдаанд ва сипас онҳо ба ватан баргашта натавонистаанд, зеро барои ин ҳуҷҷати зарурӣ надоштаанд. Баъди чанде, соли 2011 онҳо аз ҷониби қумондонҳои саҳрои Афғонистон ба агентҳои амрикоӣ фурӯхта шудаанд.

Чуноне ки дар нома зикр мегардад, пас аз бозгашт ба ватан онҳоро ба 17 соли зиндон маҳкум карданд, ки 4 соли онро онҳо аллакай паси сар кардаанд. Human Rights Watch бар асоси таҳлили парвандаҳои ҷиноии Шарофов ва Воҳидов чунин мешуморад, ки ба онҳо ҳуқуқҳои эътирофшудаи мурофиавӣ таъмин нагардидааст.

«На ҳукуматдлрони ИМА ва на айбдоркунандаи давлатӣ дар Тоҷикистон мустақиман даст доштани Шарофов ва Воҳидов ба содир намудани амали террористӣ ва зӯровариро пешниҳод карда натавонистанд», - омадааст дар нома.

«Умедворем, ки қонуни мавриди таҳия қароргирифта дар бораи афв собиқ зиндониёни Гуантанаморо низ ба эътибор хоҳад гирифт ва асноди парвандаҳои ҷиноии онҳо мавриди баррасии ҷиддии мақомот хоҳад шуд», - зикр мегардад дар изҳороти созмони байнулмилалӣ.