Дар шаҳри Маскав миёни Ваколатдорон оид ба ҳуқуқи инсони Тоҷикистон ва Русия созишномаи ҳамкорӣ ба имзо расид. Зери санади мазкур омбудсменҳои Тоҷикистону Русия Зариф Ализода ва Владимир Лукин имзо гузоштанд.

Дар иттилоияи интишоршуда дар робита ба ин масъала, гуфта мешавад, худи ҳамин рӯз дар сафоратхонаи Тоҷикистон дар Русия вохӯрии Зариф Ализода бо дипломатҳои тоҷик, кормандони Хадамоти муҳоҷирати Тоҷикистон дар Русия ва ҳамчунин намояндагони диаспораҳои тоҷик баргузор шуд.

Дар ҷараёни сафар ба Русия Ализода ҳамчунин бо гурӯҳи ҳамватаноне, ки муваққатан дар Русия кору зиндагӣ доранд, мулоқот орост. Зимни мулоқот муҳоҷирони кории тоҷик ба Ваколатдор оид ба ҳуқуқи инсони Тоҷикистон дар бораи мушкилоту душвориҳои мавҷудаи худ сухан гуфтанд.

Ҳамчунин дар бораи роҳандозии ҳамкории мутақобилаи зич бо Ваколатдор оид ба ҳуқуқи инсони Русия ва дигар созмонҳои дифоъ аз ҳуқуқи инсон ҷиҳати ҳалли ҳарчи зудтари мушкилоти мавҷудаи муҳоҷирони корӣ пешниҳодҳо карда шуданд.