Чанде қабл дар шаҳри Душанбе миёни намояндагони эътилофи Ташкилотҳои ғайридавлатӣ (ТҒД) ва гурӯҳи кори ҳукумати Тоҷикистон бо иштироки вазири адлия Рустам Менглиев, мудири шӯъбаи кафолатҳои конститутсионии ҳуқуқи шаҳрвандони Дастгоҳи иҷроияи президенти Тоҷикистон Музаффар Ашӯров ва Ваколатдор оид ба ҳуқуқи инсони Тоҷикистон Зариф Ализода муколамаи кушод оид ба баррасии тавсияҳои Гузориши марҳилавии универсалӣ сурат гирифт.

Ёдрас мекунем, ки Тоҷикистон ҳангоми муколама дар Шӯрои СММ оид ба ҳуқуқи инсон, ки моҳи октябри соли гузашта дар Женева баргузор шуд, дар доираи тартиботи Гузориши марҳилавии универсалӣ аз 42 кишвар оид ба риояи ҳуқуқи инсон 172 тавсия гирифт, ки 72-тои он аз ҷониби Тоҷикистон зимни муколама қабул карда шуданд. Боз 56 тавсияи боқимондаи кишварҳо дар иҷлосияи навбатии Шӯрои СММ оид ба ҳуқуқи инсон, ки 14-уми марти соли 2012 дар Женева доир мегардад, баррасӣ мешаванд.

Тавре ба ОИ «Азия-Плюс» аз Дафтар оид ба ҳуқуқи инсон ва риояи қонуният дар ҶТ хабар доданд, Эътилофи ТҒД оид ба омодасозии гузориши алтернативии Гузориши марҳилавии унвиверсалӣ аз баргузор намудани муколамаи кушоди ҳукумати ҷТ бо ҷомеаи шаҳрвандӣ оид ба баррасии тавсияҳои Гузориши марҳилавии унвиверсалӣ, ки дар иҷлосияи навбатии Шӯрои СММ оид ба ҳуқуқи инсон пешниҳод мегарданд, изҳори хушунудӣ кардааст.

Иштирокдорони муколама атрофи тавсияҳои пешниҳодшуда дар бораи бекор кардани ҳукми қатл ва мубориза бо шиканҷа, озодии баён, мустақилияти судҳо ва дастрасӣ ба шахсони аз озодӣ маҳрумшуда ва риояи ҳуқуқи шахсони имконияташон маҳдуд табодули афкор намуданд.

Дар фарҷоми муколама иштирокдорони он таҳия кардани нақшаи миллии татбиқи тавсияҳои Шӯрои СММ оид ба ҳуқуқи инсон барои солҳои 2012-2016-ро ба нақша гирифтанд.