Тибқи назари Ташкилоти ҷамъиятии «Дафтари ҳуқуқи инсон», директори Маркази мустақили ҳифзи ҳуқуқи инсон Сергей Романов беҳтарин ҳомии ҳуқуқи инсон дар соли 2012 эътироф гардид.

Зимни супурдани ҷоиза муовини директори ТҶ «Дафтари ҳуқуқи инсон» Таҳмина Ҷураева зикр кард, ки имсол дар ду номинатсияи дигар – «Барои саҳми арзанда дар пешбурди риояи ҳуқуқи инсон» ва «Барои мавқеъи фаъоли шаҳрвандӣ дар журналистика» низ мутаносибан ба Ассостсиатсияи ҳуқуқшиносони ҷавони «Ампаро» ва хабарнигори ОИ «Азия-Плюс» Рамзия Мирзобекова низ ҷоизаҳо тақдим гардиданд.

«Ҳадафи аслии тақдими ҷоизаҳо ҳавасмандсозӣ ва эътирофи фаъолияти ташкилот ва ҳомиёни ҳуқуқи инсон буда, мутмаинем, ки имсол ҳам он насиби беҳтаринҳо шуд», - гуфт Ҷураева.

Қобили зикр аст, ки ҷоизаи «Беҳтарин ҳомии ҳуқуқи сол» соли 2009 таъсис дода шуда, то ин замон собиқ сардори шӯъбаи кафолатҳои конститутсионии ҳуқуқи инсони Дастгоҳи иҷроияи президенти ҶТ Юсуф Салимов, ҳомии ҳуқуқ Татяна Хатюхина ва ҳуқуқшиноси Маркази ҳуқуқи инсон ва адвокат Шӯҳрат Қудратов ба ин ҷоиза сарафроз гардонида шудаанд.