Тибқи назари Ташкилоти ҷамъиятии «Дафтари ҳуқуқи инсон ва риояи қонуният», ҳуқуқшиноси маъруфи кишвар, директори ТҶ «Перспектива +» Ойниҳол Бобоназарова беҳтарин ҳомии ҳуқуқи инсон дар соли 2013 эътироф гардид.

«Ин унвон маро ба масъулияти бештар доштан дар кори пешбурди ҳуқуқи инсон дар Тоҷикистон водор мекунад», - гуфт зимни гирифтани ҷоиза Ойниҳол Бобоназарова.

Дар номинатсияҳои «Барои саҳми арзанда дар пешбурди риояи ҳуқуқи инсон» Ассотсиатсияи ҳуқуқшиносони Помир ва «Барои мавқеъи фаъоли шаҳрвандӣ дар журналистика» рӯзноманигор Анора Саркорова ба ҷоизаҳо сазовор дониста шуданд.

Адвокати Дафтари ҳуқуқи инсон Гулчеҳра Холматова барои дастболо шудан дар парвандаҳо алайҳи ВКД ҶТ оид ба пардохти ҷубронпулӣ ба ҷабрдидагон аз шиканҷа бо ҷоизаи махсус қадрдонӣ шуд.

«Ҳадафи аслии тақдими ҷоизаҳо ҳавасмандсозӣ ва эътирофи фаъолияти ташкилот ва ҳомиёни ҳуқуқи инсон буда, мутмаинем, ки имсол ҳам он насиби беҳтаринҳо шуд», - гуфт намояндаи Дафтар Таҳмина Ҷӯраева.

Қобили зикр аст, ки ҷоизаи «Беҳтарин ҳомии ҳуқуқи сол» соли 2009 таъсис дода шуда, то ин замон собиқ сардори шӯъбаи кафолатҳои конститутсионии ҳуқуқи инсони Дастгоҳи иҷроияи президенти ҶТ Юсуф Салимов, ҳомии ҳуқуқ Татяна Хатюхина, ҳуқуқшиноси Маркази ҳуқуқи инсон ва адвокат Шӯҳрат Қудратов ва ҳамчунин соли гузашта директори Маркази мустақили ҳифзи ҳуқуқи инсон Сергей Романов ба ин ҷоиза сарфароз гардонида шудаанд.