Гурӯҳи кории ҳукумати Тоҷикистон лоиҳаи қонун «Дар бораи Ваколатдор оид ба ҳуқуқи кӯдак»-ро таҳия намуд.

Як манбаъ аз ҳукумати ҷумҳурӣ ба «Азия-Плюс» дар ин робита иттилоъ дод, ки лоиҳаи қонун бо тамоми вазорату идораҳои дахлдори ҷумҳурӣ мувофиқа шуда, ояндаи наздик ба баррасии палатаи поёнии парлумон пешниҳод мегардад.

Лоиҳаи қонуни мазкур бо мақсади таъсиси ниҳоди Ваколатдор оид ба ҳуқуқи кӯдак дар Тоҷикистон таҳия шуда, дар он тартиби таъин ва аз кор озод шудани ваколатдор, ҳуқуқу шаклҳои фаъолияти ин ниҳод барои ҳифз ва пешбурди ҳуқуқҳои кӯдакон дар ҷумҳурӣ муайян карда мешавад.

Мутобиқи меъёрҳои қонунгузорӣ, Ваколатдор оид ба ҳуқуқи кӯдакро бо розигии Маҷлиси намояндагони Маҷлиси Олӣ президенти мамлакат таъин мекунад. Шахси ба ин вазифа таъиншуда дар ҷаласаи палатаи поёнии парлумон савганд ёд мекунад.

Ёдрас мекунем, ки дар паёми худ ба парлумон рӯзи 23 январи соли равон президенти Тоҷикистон Эмомалӣ Раҳмон пешниҳод карда буд, ки ба хотири таъмини ҳифзи ҳуқуқи кӯдакон, дар ҷумҳурӣ ниҳоди Ваколдатдор оид ба ҳуқуқи кӯдакон таъсис дода шавад.