Бунёди австралиягии ҳомии ҳуқуқи Walk Free Foundation (WFF) феҳристи ҷаҳонии кишварҳо аз рӯи шумори одамонеро, ки дар шароити ғуломӣ зиндагӣ мекунанд, таҳия намуд.

Дар таҳқиқоти Global Slavery Index 2016  (Индекси глобалии ғуломӣ- 2016) миёни 167 кишвари ба рӯйхат шомилгардида Тоҷикистон зинаи 19-умро ишғол мекунад.

Қайд мешавад, ки дар Тоҷикистон бо шумори аҳолии беш аз 8 млн. 482 ҳазор нафар 54,1 ҳазор нафар (0,638% аз шумори умумии аҳолӣ) дар ғуломӣ қарор доранд.

Бино ба маълумоти гузориши WFF, дар ҷаҳон айни замон зиёда аз 45 млн. нафар дар ғуломӣ қарор дошта, қисмати зиёди онҳо дар минтақаи Осиё ва Уқёнуси Ором зиндагӣ мекунанд. Аз соли 2014 шумори умумии ғуломон дар саросари дунё 28% афзудааст.

Шумори аз ҳама бештари ғуломон дар Ҷумҳурии халқии демократии Корея (зинаи 1-ум дар феҳрист) ба қайд гирифта шудааст, ки 4,37% аз шумори умумии аҳолии ин кишварро ташкил медиҳад. Дар гузориш Русия дар мақоми 16-ум қарор дошта, дар он беш аз 1 млн. нафар ғуломон (0.732%) ба сар мебаранд.

Тибқи маълумоти WFF, байни кишварҳои минтақаи Осиёи Марказӣ шумори аз ҳама бештари ғуломон дар Ӯзбекистон - 1 млн. 236 ҳазор нафар ба қайд гирифта шудаааст, ки ҳудуди 4% аз шумори умумии аҳолиро ташкил медиҳад ва аз рӯи ин нишондиҳанда Ӯзбекистон дар феҳрист мақоми дуюмро касб кардааст.

Гуфта мешавад, дар Қазоқистон 81,6 ҳазор нафар (0.467%), Қирғизиситон - 27,7 ҳазор нафар (0.467%) ва Туркманистон - 15,8 ҳазор нафар (0.295%) дар шароити ғуломӣ зиндагӣ доштаанд.

Зимни арзёбии шароити муосири ғуломӣ дар таҳқиқоти Walk Free Foundation шаклҳои гуногуни истисмори одам ба инобат гирифта шудааст, ки дар ин ҳолатҳо ӯ маҷбур аст бар асари таҳдиду фишор, кирдори бераҳмона ё амалҳои фиребгарона ин ё он кору фаъолиятеро анҷом диҳад.