Натиҷаҳои интихоботи порлумонии рӯзи 4-уми октябри Қирғизистон беэътибор эълон шуданд, хабар медиҳад Радиои Озодӣ дар такя ба иҷрокунандаи вазифаи Додситони кулли Қирғизистон Алмамбет Шикмаматов. Ҳамчунин ба гузориши ин расона Омурбек Суваналиев номзад ба мақоми вакилии порлумони Қирғизистон аз Ҳизби "Бутун Қирғизистон" гуфтааст, ки “дар робита ба ҳаводиси ахири кишвараш фаъолияти ниҳодҳои қудратиро ҳамоҳанг хоҳад кард”.

Раисҷумҳури Қирғизистон Сооронбой Жээнбеков ҳам субҳи имрӯз дар як изҳороташ гуфта буд, ки “ба Комиссияи марказии интихобот пешниҳод кардааст, ки ҳамаи мавридҳои тақаллубро таҳқиқ кунан ва дар сурати зарурат натиҷаҳои интихоботро беэътибор эълон кунанд”.

Аз дирӯз то кунун ба навиштаи Kaktus.media бар пайи эътирозҳо Алмосбек Ҳотамбоев, раисҷумҳури пешин аз боздоштгоҳи КДАМ, сарвазири собиқ Сафар Исҳоқов аз маҳбас, сиёсатмадори мухолиф Равшан Жээнбеков аз боздоштгоҳи рақами 1-и Бишкек озод карда шудаанд.

Рӯзи Душанбе дар Бишкек, дар майдони Ала-Тоо ҳудуди 2 ҳазор нафар ҷонибдорони ҳизбҳое, ки ба порлумон роҳ наёфтанд ҷамъ омада буданд. Онҳо талаб доштанд, ки натиҷаҳои интихобот бекор ва раъйдиҳии такрории интихоботи маҷлиси қонунгузорӣ гузаронида шавад. Шоми душанбе зимни талошҳои пароканда кардани эътирозгарон миёни онҳо ва неруҳои ҳифзи ҳуқуқ бархӯрд сурат гирифт. Шаби душанбе ба сешанбе эътирозгарон ба бинои Қасри сафед, ки онҷо порлумон ва маъмурияти президенти Қирғизистон қарор дорад, ворид шуданд. Баъдан ба сӯйи Кумитаи давлатии амнияти миллӣ рафатан ва раисҷумҳури собиқ Алмосбек Ҳотамбоевро аз ҳабс озод карданд.

Интихоботи порлумонии Қирғизистон 4 октябр баргузор шуд. Ҳузури раъйдиҳандагон дар он 56,5% гуфта мешавад. Мувофиқи натиҷаҳои пешакии раъйдиҳӣ, ба порлумон 4 ҳизб роҳ ёфтаанд: "Биримдик" ("Ваҳдат", ҳизби ҷонибдори ҳукумат) бо 24,52% раъй, "Мекеним Қирғизистон" ("Қирғизистони азизам", ҳизби ҷонибдори ҳукумат) бо 23,89%, раъй, "Қирғизистон"(ҳизби марказгаро) бо 8,73% раъй ва "Бутун Қирғизистон" ("Қирғизистони ягона ", ҳизби марказгаро) бо 7,11%раъй. Ҳизбои боқимонда натавонистон сади ҳафтдарсадиро убур кунанд.

Лутфан, хабари муҳим, суол ва аксу видеоҳои ҷолибро дар бораи масоили ҳалталаби ҷомеа ба Asia-Plus тариқи Viber, Telegram, Whatsapp, Imo бо рақами +992 93 792 42 45 фиристед. 

Дар Telegram, Facebook, Instagram, Viber, Яндекс.Дзен, OK ва Google Новости бо мо бимонед.