Аз соли 2022 то кунун дар ҷараёни боздоштҳои Хадамоти федералии бехатарӣ (ФСБ) дар Русия  дастикам 70 нафар кушта шудаанд, ки 9 тани онҳо зодагони Осиёи Марказӣ будаанд. Дар ин бора сомонаи "Важние истории" хабар додааст.

Ин расона бар асоси гузоришҳои ФСБ, Кумитаи миллии зиддитеррористӣ, Кумитаи тафтишот, оҷонсиҳои хабарии давлатӣ ва расонаҳои наздик ба нерӯҳои амниятӣ ин оморро ҳисоб кардааст.

Ба навиштаи манбаъ, маъмурони ФСБ дар ҷараёни боздошт дастикам 65 нафарро дар Русия ва 4 нафарро дар қисмати ишғолшудаи вилояти Запороже куштаанд. Инчунин, 1 нафари дигар, ба гуфтаи худи хадамоти махсус, дар лаҳзаи боздошт дар наздикии Самара худро бо бомба тарконидааст.

“Дар 28 ҳолат ФСБ кушташудагонро дар омода кардани ҳамлаҳо тибқи фармони хадамоти махсуси Украина ё воҳидҳои ихтиёрии Қувваҳои мусаллаҳи Украина гумонбар донистааст”, - менависад расонаи русӣ.

Тибқи омори "Важние истории", ҳадди ақал 44 кушташуда шаҳрвандони Русия будаанд.

Ба гуфтаи манбаъ, 9 тани онҳо зодагони кишварҳои Осиёи Марказӣ ҳастанд. Ҳадди ақал 2 нафари кушташудагон шаҳрвандони Қазоқистон будаанд. ФСБ гуфтааст, онҳо гуё бо дастури шохаи "Хуросон"-и ДОИШ ният доштанд, дар каниса ё ибодатгоҳи яҳудиён дар Маскав таркиш анҷом диҳанд. 

Вале дақиқ гуфта нашудааст, ки дигар кушташудагон шаҳрвандони кадом кишварҳои Осиёи Марказӣ мебошанд.

Бояд гуфт, ки моҳи феврали имсол се ҷавони муҳоҷири тоҷик дар Русия бо иттиҳоми эҳтимолии даст доштан ба терроризм кушта шуданд. Аммо пайвандонаш исрор меварзанд, ки қурбониён майли ифротгароӣ ва гузаштаи ҷиноӣ надоштанд. Ду ҷавон яккаписару ягона ноновари хона будаанд. Бештар дар ин пайванд бихонеду бубинед.

Дар Telegram, Facebook ва Instagram бо мо бимонед.