Душанбе. 18-уми август. ОИ «Азия-Плюс» - Президенти Ассотсиатсияи рӯзноманигорони риштаи варзиши ҷумҳурӣ Нарзулло Латифов аз Пекин тариқи телефон хабар дод, ки дар давраи чаҳорякниҳоии мусобиқоти боксчиён дар вазни 51 кг ҳарифи боксчии тоҷик муайян шудааст.

«Боксчии мо - Анвар Юнусов 20-уми август дар давраи чаҳорякниҳоӣ бо варзишгари Таиланд Чон Сом Гит қувваозмоӣ хоҳад кард, - гуфт ӯ. - Боксчии таиландӣ дар мусобиқоти гуногун ду маротиба бар А.Юнусов дастболо шудааст».

Ба қавли Н.Латифов, зимни сӯҳбат А.Юнусов иброз доштааст, ки акнун фурсати қулай даст додааст, то ӯ интиқоми худро аз боксчии таиландӣ бигирад.

Ёдрас мекунем, ки боксчии дигари Тоҷик Ҷаҳон Қурбонов, ки ӯ низ ба мусобиқоти чаҳорякфиналӣ роҳ ёфтааст, рӯзи 19-уми август бо боксчии қазоқ Веркебулат Шиналиев қувваозмоӣ хоҳад кард.

Дар Бозиҳои Олимпии Пекин айни замон Тоҷикистон дар мақоми 63-уми ҷой гирифтааст.