Дастаи футболи «Вахш»-и Қӯрғонтеппа нахустин шуда ба даври нимфиналии мусобиқоти дарёфти Ҷоми футболи Тоҷикистон роҳ ёфт.

Бино ба иттилои сомонаи расмии Федератсияи футболи Тоҷикистон, дар вохӯрии ҷавобӣ, ки рӯзи 17-уми август доир гардид, дастаи «Вахш» дар майдони худ бори дигар бар дастаи «Эсхата»-и Хуҷанд бо ҳисоби 3 бар 0 ғолиб омад. Бозии аввал низ дар Хуҷанд ба фоидаи меҳмонон бо ҳисоби 2 бар 1 анҷом ёфта буд.

Гуфта мешавад, тӯбҳоро дар дақиқаҳои 67, 70 ва 74-уми бозӣ ҳимоятгари дастаи «Вахш» Умедҷон Шарифов ба самар расонида, вале дар дақиқаи 81-ум корти сурх гирифтаву аз майдон хориҷ шудааст.

Акнун дар бозии нимфиналӣ дастаи «Вахш» бо ғолиби ҷуфти чорякфиналии «Энергетик (Душанбе)-Регар-ТадАЗ» (Турсунзода) қувваозмоӣ мекунад.

Се бозии боқимондаи даври чорякфиналии Ҷоми футболи Тоҷикистон миёни дастаҳои «Равшан (Кӯлоб) – «Парвоз» (ноҳ. Бобоҷон Ғафуров), «Энергетик» – «Регар-ТадАЗ» ва «Истиқлол» (Душанбе) – «Истаравшан» (Истаравшан) имрӯз доир мегарданд.