Шоми имрӯз дар Бейрут (Лубнон) дар даври гурӯҳии мусобиқоти Ҷоми Конфедератсияи футболи Осиё (КФО) вохӯрии охирини дастаи «Равшан»-и Кӯлоб, қаҳрамони Лигаи олии футболи Тоҷикистон дар соли 2013 бо дастаи «Сафо»-и ин кишвар доир мегардад.

Бино ба иттилои сомонаи расмии Кумитаи миллии олимпии ҷумҳурӣ, санаи 22-юми апрел ҳайати дастаи «Равшан» ба Бейрут раҳсипор шудааст.

Қобили зикр аст, ки дар мусобиқоти имсолаи Ҷоми КФО дастаи «Равшан» дар ҳамаи панҷ бозиҳо ба шикаст мувоҷеҳ гардида, новобаста аз натиҷаи бозии охирин, аз ҳаққи ширкат дар даври баъдии мусобиқа маҳрум шуд.

Дур гурӯҳи «А»-и мусобиқоти мазкур, ки дастаи «Равшан» дар он бозӣ мекунад, пас аз панҷ давр тимҳои «Сафо»-и Лубнон (13 имтиёз) ва «Зат Рас»-и Урдун (10 имтиёз) зинаҳои аввалро ишғол намуда, пеш аз муҳлат ба даври 1/8 финалии мусобиқот роҳхат гирифтанд.

Дастаи «Ал-Сувайк» (Уммон) бо касби 6 имтиёз дар зинаи сеюм қарор гирифта, тими «Равшан» то ҳол ҳеҷ имтиёзе ба даст наовардааст.