Акмалиддин Каримов, паҳлавони тоҷик, дар мусобиқаи XIV байналмилалӣ оид ба самбо дар Владивостоки Русия, ки даври Ҷоми ҷаҳонӣ маҳсуб мешавад, соҳиби медали биринҷӣ гардид.

Бино ба иттилои сомонаи расмии Кумитаи миллии олимпии ҷумҳурӣ, вай дар рақобатҳо дар вазни то 57 кг мақоми севумро касб кард. Дар ин вазн Баҳодур Боқиев аз Русия ғолиб шуд. Ганхуаг Мунх Бат (Русия) ҷойи дувумро гирифт. Ба ҷуз Акмалиддин Каримов, Багила Денис (Русия) мақоми севумро соҳиб шуд.

Гуфта мешавад, дар ин мусобиқаи байналмилалӣ ба хотираи Юрий Потапов, нахустин раиси Федератсияи самбо ва дзюдои Приморе ва муовини раиси Федератсияи самбои Русия, ки рӯзҳои 25-26-уми май дар Владивосток баргузор шуд, беш аз 140 варзишгар аз 16 кишвар: Русия, Олмон, Литва, Булғористон, Молдова, Арманистон, Беларус, Қазоқистон, Тоҷикистон, Узбакистон, Қирғизистон, Молдова, Муғулистон, Чин, Тайланд ва Куриёи Ҷанубӣ ширкат доштанд.