Варзишгари аввалини Тоҷикистон, гурзандоз Дилшод Назаров ба ҳуқуқи иштирок дар Бозиҳои Олимпиада-2016 дар Рио-де-Жанейро (Бразилия) даст ёфт.

Рӯзи 25 май ӯ дар мусобиқаи анъанавии ҷаҳонии силсилаи Гран-При «Оstrava golden spike» дар Чехия ширкат варзида, ба натиҷаи дуюм дар ҷаҳон ноил гардид. Дилшод гурзро ба масофаи 79,36 см партофт, ки ин ба ӯ барои иштирок дар мусобиқаҳои Чемпионати ҷаҳон-2015 (22-30 август, Пекин) ва Бозиҳои Олимпиада-2016 дар Рио-де-Жанейро ҳуқуқ медиҳад.

Зинаи аввал дар ин мусобиқаро бо нишондиҳандаи 80,75 см варзишгари Лаҳистон (Полша) Павел Файдек ва мақоми сеюмро бо натиҷаи 77,71 см намояндаи Маҷористон (Венгрия) Кристиан Парс ишғол намуданд.

Акнун Дилшод Назаров дар мусобиқаи навбатии Чемпионати Осиё, ки рӯзҳои 3-7 июн дар шаҳри Ухани Чин баргузор мегардад, ширкат меварзад.

Бозиҳои олимпии соли 2016 барои Дилшод Назаров Олимпиадаи чорум аст. Бори нахуст ӯ соли 2004 дар Олимпиадаи Афина (Юнон) иштирок кард. Дар Олимпиадаи соли 2008 дар Пекин ӯ зинаи 11-ум ва дар Олимпиадаи соли 2012 дар Лондон мақоми 10-умро касб намуда буд.

Дилшод Назаров қаҳрамони Осиё дар солҳои 2009 ва 2013 аст. Дар мусобиқаи Чемпионати ҷаҳон соли 2013 дар Маскав ба дарёфти мақоми 5-ум ноил гардида буд.

Қобили зикр аст, ки дар баробари варзишгари маъруф будан, айни замон Дилшод Назаров ба ҳайси муовини раиси Кумитаи ҷавонон, варзиш ва сайёҳии назди ҳукумати Тоҷикистон низ фаъолият дорад.