Чемпиони дукаратаи Ҷоми бошгоҳи футболи «Истиқлол» дастаи Федератсияи футболи Тоҷикистон (ФФТ) ваколати чемпиониашро анҷом дод.

Бино ба иттилои сомонаи расмии ФФТ, дар бозии нимниҳоӣ чемпион аз дастаи «Антикоррупсия» тавассути зарбаҳои пеналти бо ҳисоби 3 бар 4 мағлуб шуд. Вақти асосии вохӯрӣ бо ҳисоби баробари 2 бар 2 анҷом ёфт. Ин нахустин бохти дастаи Федератсияи футболи Тоҷикистон дар давоми се соли иштирокаш  дар ин мусобиқа мебошад.

Гуфта мешавад, дар бозии дигари нимниҳоӣ соҳибони мусобиқа дастаи «Истиқлол» бар «Ориёнбонк» бо ҳисоби 7 бар 4 пирӯз шуд.

Зимнан зикр мегардад, ки ба ин тартиб, рузи шанбеи 5 сентябр дар бозӣ барои ҷои сеюм «Ориёнбонк» бо ФФТ ва дар бозии ниҳоӣ «Истиқлол» бо «Антикоррупсия» рақобат мекунанд. Оғози бозиҳо мутаносибан соати 18.00 ва 19.00.

Ёдрас мешавад, ки мукофотпулии сеюмин Ҷоми бошгоҳи футболи «Истиқлол» 70 ҳазор сомониро ташкил мекунад. Дастаи ғолиб бо Ҷом ва маблағи пулӣ дар ҳаҷми  40 ҳазор сомонӣ, финалисти мусобиқа бо маблағ дар ҳаҷми 20 ҳазор сомонӣ ва ҷоизадори медалҳои биринҷӣ бошад бо маблағ дар ҳаҷми 10 ҳазор сомонӣ сарфароз гардонида мешаванд.