Шоми рӯзи 8 октябр бозии интихобии Ҷоми Ҷаҳон оид ба футбол-2018 (Осиё) дар гурӯҳи "Б" миёни дастаҳои мунтахаби Қирғизистон ва Тоҷикистон дар Бишкек бо ҳисоби 2 бар 2 анҷом пазируфт.

Бино ба маълумоти Федератсияи футболи Тоҷикистон, дар оғози бозӣ футболбозони қирғиз ҳисобро кушода, дар дақиқаи 62-юми қисми дуюми бозӣ Манучеҳр Ҷалилов ҳисобро баробар кард. Дар дақиқаи 71-ум тоҷикистониён боз як тӯб зада ба ғалаба наздик буданд, вале дар дақиқаи 5-уми иловашуда футболбозони қирғиз ҳисобро бо зарбаи 11-метра баробар карданд.

Дар бозии дигари гурӯҳи «Б» Урдун дар майдони худ тими Австралияро бо ҳисоби 2 бар 0 мағлуб намуда, бо 10 имтиёз дар зинаи аввали ҷадвал қарор гирифт ва дастаи Австралия бо 9 хол ба зинаи 2-юм поин фаромад. Дасти Қирғизистон бо 5 хол, дар зинаи сеюм, Тоҷикистон бо 2 имтиёз дар мақоми 4-ум ва Бангладеш бо 1 хол дар зинаи охири ҷадвал қарор доранд.

Бозии навбатии дастаи мунтахаби футболи Тоҷикистон дар ин гурӯҳ рӯзи 13 октябр бо дастаи Урдун баргузор мешавад.