Дар марҳилаи интихобии Чемпионати ҷахон-2018 оид ба футбол дар гурӯҳи «В» мунтахаби футболи Тоҷикистон дар меҳмонӣ аз дастаи мнутахаби Урдун бо ҳисоби 0 бар 3 шикаст хӯрд.

Бино ба иттилои Федератсияи футболи ҷумҳурӣ, дар ин вохӯрӣ соҳибони майдон ҳамаи тӯбҳоро дар қисми дуюм ба самар расониданд. Дар вохӯрии дуюми ин гурӯҳ Қирғизистон дар майдони худ бар дастаи Бангладеш бо ҳисоби 2 бар 0 дастболо шуд.

Ҳамин тариқ, дар гуруҳи «В» бо 13 имтиёз (аз 5 бозӣ) дастаи Урдун пешсафи ҷадвал буда, зинаи дуюмро бо 9 имтиёз (аз 4 бозӣ) ғолиби Ҷоми Осиё-2015 - футболбозони Австралия ишғол мекунанд.

Дастаи Қирғизистон бо 8 хол, дар зинаи сеюм, Тоҷикистон бо 2 имтиёз дар мақоми 4-ум ва Бангладеш бо 1 хол дар зинаи охири ҷадвал қарор доранд.

Бозии навбатии дастаи мунтахаби футболи Тоҷикистон дар ин гурӯҳ рӯзи 12 ноябр бо дастаи Бангладеш дар Варзишгоҳи марказии ҷумҳуриявӣ дар шаҳри Душанбе баргузор мешавад. Дар ин рӯз Австралия дар майдони худ ластаи Қирғизистонро қабул мекунад.