Собиқ футболбози дастаҳои «Истиқлол»-и Душанбе ва «Хуҷанд»-и Хуҷанд Искандар Ҷалилов ҳунарнамоии худро дар тими аврупоии «Дунав»-и Булғористон идома медиҳад.

Бино ба иттилои хадамоти матбуоти Федератсияи футболи Тоҷикистон, Искандар Ҷалилов аз дастаи «Волга» (Нижегород), ки муддати ду сол дар он бозӣ кардааст, ба ин даста гузашта, пештар нимсолӣ дар дастаҳои «Истиқлол» ва «Хуҷанд» ҳунарнамоӣ дошт ва ҳамчунин дар тимҳои «Рубин» (Қазон), «Нефтехимик» (Нижнекамск) ва «Турну-Северин» (Руминия) низ бозӣ кардааст.

Гуфта мешавад, И.Ҷалилов дар ҳайати мунтахаби футболи Тоҷикистон низ бозӣ карда, дар бозии дӯстона бо тими Эстония (1:2) бозигарро иваз карда буд.

Ба иттилои манбаъ, дар тими нави худ Искандар Ҷалилов метавонад аллакай рӯзи шанбе, 30 июл дар вохӯрӣ бо дастаи «Верея» дар даври якуми мусобиқаи чемпионати Булғористон бори нахуст ба бозӣ барояд.

Қобили зикр аст, ки Искандар Ҷалилов дуюмин футболбози тоҷик аст, ки дар чемпионати Булғористон ҳунарнамоӣ мекунад. Қаблан нимҳимоятгари мунтахаби футболи Тоҷикистон Парвизҷон Умарбоев ба дастаи «Локомотив»-и Пловдив гузашта буд. Пештар Умарбоев якуним сол дар ҳайати тими «Истиқлол» бозӣ карда буд.