Дар бозии дӯстонаи мунтахаби футболи Тоҷикистон ва Сурия, ки рӯзи шанбеи ҳафтаи оянда, санаи 27 август дар варзишгоҳи «20-солагии истиқлолияти Тоҷикистон» дар шаҳри Хуҷанд доир мегардад, миёни тамошобинон бозии лотерея гузаронида мешавад.

Бино ба иттилои сомонаи расмии Федератсияи футболи Тоҷикистон, пас аз анҷоми вохӯрӣ тибқи рақамҳои билетҳои воридшавӣ миёни мухлисон бозии лотерея гузаронида шуда, онҳо имкон доранд, ки ба як қатор бурдҳои арзишманд соҳиб шаванд.

Гуфта мешавад, дар бозии лотерея мухлисон ба бурдҳои планшет, смартфони навтарин, сарулибоси варзишӣ ва автомашинаи «Мерседес-Бенс» ноил гардида метавонанд.

Зимнан зикр мегардад, ки аввали ҳафтаи оянда фурӯши билетҳои ин бозӣ оғоз гардида, арзиши билет ба ҳамаи нишастгоҳҳои варзишгоҳ 20 сомонӣ аст.