Дар мусобиқаи байнулмилалии Гран-прии «Grand-Prix Antalya 2018», ки санаи шоми санаи 8 апрел дар шаҳри Анталияи Туркия ба итмом расид, дзюдочии тоҷик Комроншоҳи Устопириён медали тилло ба даст овард.

Дар вазни то 90 кило ӯ бар 4 ҳарифаш - Самули Виитанен (Финландия), Солтон Броун (ИМА), Мамадалӣ Меҳдиев (Озарбойҷон) ва чемпиони ҷаҳон дар соли 2017  Неманя Майдов аз Сербия дастболо шуд. Ҳамаи рақибон пеш аз муҳлат бо баҳои баландтарин – иппон мағлуб шуданд.

Қобили зикр аст, ки дар ин мусобиқа Тоҷикистонро 6 гуштигир намояндагӣ карда, дар вазни то 100 кило Саидҷалол Саидов зинаи 7-умро ишғол намуд. Наврӯз Каримзод, Беҳрӯз Хоҷазода, Акмал Муродов ва Ҷаҳонгир Маҷидов аз уҳдаи касби мақом дар ҳаштгонаи вазнашон набаромаданд.

Дар феҳристи Федератсияи байнулмилалии дзюдо (IJF) дар вазни то 90 кило Комроншоҳи Устопириён акнун мавқеи 7-умро ишғол мекунад.

Хабарҳои моро дар Telegram пайгирӣ намоед, ба шабакаи мо бо суроғаи  https://t.me/asiaplus  ҳамроҳ шавед.