Варзишгари ҷавони тоҷик дар гӯштини тарзи юнониву румӣ (дар вазни 67 кг) Суннат Абдуллоев наметавонад дар мусобиқаи чемпионати ҷаҳон дар Испания иштирок кунад.

“Гап сари он аст, ки гӯштингир аз Тоҷикистон ният дошт, ки дар мусобиқаи чемпионати ҷаҳон миёни варзишгарони синни то 20-сола иштирок кунад, вале ба парвози ӯ иҷоза нашуд, - хабар медиҳад Федератсияи гӯштини ҷумҳурӣ. - Ба варзишгар парвоз аз Туркия ба Испанияро иҷоза надода, ӯ муддати ду рӯз инҷониб дар фурудгоҳи Туркия қарор дорад”.

Ба иттилои манбаъ, ба ин “надоштани сарпараст ва мушкилоти парвози баргашт” сабаб шудааст.

Ин чӣ маъно дорад, дар хабар шарҳ дода намешавад.

Федератсия хабар медиҳад, ки алҳол Суннат Абдуллоев ҳаққи баромадан аз Туркияро надорад.

“Мо ба ҳалли ин масъала машғулем, - омадааст дар хабар. - Ин бори аввал нест ки ин гуна мушкилот барои гӯштингирони мо ба вуҷуд меояд. Соли гузашта низ Суннат Абдуллоев ба сабаби мушкилоти раводид (виза) ба мусобиқоти ҷаҳони дар Италия рафта натавонист”.

Мусобиқаи Чемпионати ҷаҳон миёни ҷавонон дар Испания аз 2 то 8 сентябр баргузор мешавад.

Дар Telegram, Facebook ва Instagram бо мо бимонед.