Рошид Неъматов, ҷудокори навраси тоҷик дар мусобиқаи байналмилалии Ҷоми Африқо, ки дар шаҳри Касабланкаи кишвари Марокаш миёни наврасону ҷавонон баргузор гардид, соҳиби медали тилло шуд.

Ӯ дар ин мусобиқа ягона намояндаи Тоҷикистон буд ва рӯзи 17-уми январ дар вазни то 73 кило баромад карда, баъди шикасти як паҳлавони кувайтӣ ва се ҷудокори мизбон ба финал баромад. Дар ин марҳила варзишгари тоҷик бо Букурат Райани аз Марокаш куштӣ гирифта, ӯро ҳам ноком кард ва медали тиллоро ба гардан овехт.

Медали Рошид Неъматов, аввалин медали наврасони тоҷик аз куштии ҷудо дар соли 2025 аст.

Тибқи иттилои Федератсияи байналмилалии ҷудо, дар мусобиқаи Ҷоми Африқо наздик ба 80 паҳлавон аз 12 кишвар ширкат кардаанд.

Бояд гуфт, Рошид Неъматов 18 сол дошта, қаблан низ ғолиби чанд мусобиқа миёни ҷавонону наврасон шуда буд. Ӯ ҳамчунин дар риштаи  ҷию-ҷитсо ҳам ҳунарнамоӣ карда, унвони қаҳрамони ҷаҳон миёни ҷавононро соҳиб гардидааст.

Дар Telegram, Facebook ва Instagram бо мо бимонед.