Дастаи “Истиқлол”-и Душанбе дар бозии ниҳоии Ҷоми Федератсияи футболи Тоҷикистон (ФФТ) "Артиш" (КМВА-Клуби марказии варзишии артиш)-ро шикаст дода, бори ҳафтум ғолиби ин мусобиқа шуд.

Набарди ду дастаи Душанбе дар финали Ҷоми ФФТ рӯзи 22-юми феврал дар Варзишгоҳи марказии пойтахт сурат гирифта, бо натиҷаи 2:0 ба нафъи "Истиқлол" анҷом ёфт. Ҳарду голро Денис Беганович, бозигари марказии босниягии "Истиқлол" дар қисми аввали вохӯрӣ зад.

Бо ҳамин "Истиқлол" барои бори 7-ум ғолиби Ҷоми ФФТ гардид. Ин даста қаблан солҳои 2014, 2015, 2017, 2018, 2019, 2021 дар мусобиқаи мазкур ғолиб омада буд.

Ҳамчунин, рӯзи 22-юми феврал қабл аз бозии финалӣ дастаҳои “Панҷшер”-и ноҳияи Ҷалолиддини Балхӣ ва “Сомон”-и ноҳиям Данғара барои ба даст овардани медалҳои биринҷии мусобиқа рақобат карданд. Дар ин мубориза дастаи “Панҷшер” бо ҳисоби 3:0 бар муқобили “Сомон” ғалаба карда, ҷои сеюми мусобиқаро соҳиб гардид.

Барои ин мусобиқа дар умум 100 ҳазор сомонӣ ҷудо шуда буд.

Дастаи Артиш
Акс аз ФФТ

Дастаи “Истиқлол”, қаҳрамони мусобиқа 50 ҳазор сомонӣ, медалҳои тилло ва ҷомро ба даст овард. Барандаи медалҳои нуқра - дастаи "Артиш" (КМВА) соҳиби 30 ҳазор сомонӣ шуд.

Дастаи зинаи сеюм - “Панҷшер” 20 ҳазор сомонӣ ва медалҳои биринҷиро моли худ кард.

Дастаи "Панҷшер"
Акс аз ФФТ

Ёдрас мешавем, ки соли гузашта Ҷоми ФФТ-ро дастаи “Равшан”-и шаҳри Кӯлоб соҳиб шуда буд. Ин даста дар финал “Ҳосилот”-и ноҳияи Фархор бо натиҷаи 1:0 ноком кард.

Дар Telegram, Facebook ва Instagram бо мо бимонед.